| هەركە سەرۆكی هەرێمی كوردستان، تەواوی بەرپرسان و نوێنەرانی كوردی لە حكومەتی ناوەندی بانگهێشتكرد بەمەبەستی تاوتوێكردنی ڕەوشی سیاسی عێراق و پرسی كورد لەگەڵ حكومەتی عێراقدا، پێشبینی كاردانەوەیەكی توندی حكومەتەكەی مالیكم كرد كە بەجۆرێك لەجۆرەكان هەوڵی شێواندنی ئەجێندای نەتەوەیی ئەو كۆبوونەوەیە بدرێت بەمەبەستی زیانگەیاندن و سەرقاڵكردنی شەقامی كوردی تاوەكو نەپرژێتە سەر مەسەلە چارەنووسسازەكانی لەگەڵ حكومەتی ناوەندیدا.هێشتاكە بەتەواوی ئەجێندای ئەو وەفدە باڵایەی كوردستان كە بەمەبەستی تاوتوێكردنی پرسی كورد رۆیشتنە بەغدا بۆ هاوڵاتیان روون نەببۆیەوە نوری مالیكی سەرۆك وەزیرانی عێراق كە دۆڕاوو شكستخواردووی هەڵبژاردنی پەرلەمانی عێراق و بەهۆی پێداگری و هەڵسوكەوتە شەڕەنگێزییەكانی و پاڵپشتی كۆماری ئێرانی ئیسلامی بەشێوەیەكی تارادەیەك دیكتاتۆرانە دووبارە بۆیەوە بەسەرۆك وەزیرانی عێراق، بڕیاری داگرتنی ئاڵای كوردستانی دەركرد لە خانەقین و دەوروبەریداو ئەمەش لەم رووانگەیەوە دێت مالیكی بەم بڕیارەی كە خودی خۆی و حكومەتەكەی دركیان بەوە كردووە كە بڕیارێكی لەم جۆرە نەقابیلی قەبووڵكردنەو نەلەلایەن هاوڵاتیانی كوردی خانەقین و هیچ ناوچەیەكی دیكەی دابڕاو لە كوردستان جێبەجێدەكرێت، كەچی مەبەست لەدەركردنی بڕیارێكی نایاسایی لەم شێوەیە تەنیا سەرقاڵكردنی كوردە بۆ ئەوەی كورد نەپرژێنە سەر مەسەلە چارەنووسسازەكانی وەك پرسی مادەی 140 و پێشمەرگەو یاسای نەوت و.... زۆر بڕیار و پرسی دیكەش كە راستەوخۆ پەیوەندیان بەژیان و ماف و ئازادی خەڵكی كوردستانەوە هەیەو مالیكی دەیەوێت لەگەڵ كۆتایی هێنانی كابینەكەی چارەسەریان نەكات یاخود بڕیارو مادە دەستوورییەكان كە لەبەرژەوەندی كورددان جێبەجێ نەكات و وەك ئاریشەیەكی زیندوو لەدوای خۆیدا بەهەڵپەسێردراوی بیانهێڵێتەوە.لەگەڵ ئەوەی كە ئەم بڕیارە كاردانەوەی دەرەكی لێكەوتەوە، مەبەست لەكاردانەوەی دەرەكی ئەوەیە لەسەر ئاستی عێراق دەنگدانەوەی جۆراو جۆری هەبووە، ئەوا بەپێچەوانەوە لەسەر ئاستی كوردستان كاریگەرییەكان بەشێوەیەكی تربوون كە لە دهۆك ئاڵای عێراق داگیرایە خوارەوەو چەندین خۆپیشاندانیش ئەنجامدرا دژ بەم بڕیارەی مالیكی، كەواتە مالیكی توانی بەجۆرێك لە جۆرەكان هەرێمی كوردستان سەرقاڵ بكات كە ئەم سەرقاڵییە بەهیچ جۆرێك لەبەرژەوەندی خەڵكی كوردستاندا نییەو ئەمەش لەكاتێكدایە خودی مالیكی خۆی زۆر باش دەیزانی ئەم بریارەی جێبەجێ ناكرێت و تەنیا مەبەستی ئەو سەرقاڵكردن و لەبیربردنەوەی پرسە چارەنووسسازەكانی دیكەی پەیوەست بەخەڵكی كوردستانە بۆ ئەوەی خۆی لە جێبەجێكردنیان بدزێتەوەو بەجۆرێك لەجۆرەكان و بەزانێكی جیاواز بەشەقامی عەرەبی و ئێرانی بڵێت كەوا من هەوڵی چارەسەركردنی پرسی كورد لە بەشەكەی عێراق نادەم و تەنیا كاتیان پێدەكوژم تا ئەو كاتەی دەوڵەتی عێراق و سوپاكەی دروست دەبنەوەو توانای بەرگریكردنیان دەبێت، ئینجا بەراشكاوی سیاسەتی عێراق بەرانبەر بە كورد و پرسەكەی بۆ رای جیهانی و عەرەبی و عێراقی رادەگەیەنمٍ.بۆیە باشتروایە كورد بەتایبەتی دەزگەكانی راگەیاندن وەك چۆن بایەخ بەم پرسە واتە داگرتنی ئاڵای كوردستان دەدەن ئاواش دۆسییە چارەنووسسازەكانی دیكەی كورد بورژێننەوە بۆ ئەوەی خەڵكی كوردستان و بەرپرسانی عەرەبی عێراق لەمە تێبگەن ئیدی ئێستاكە كورد ئەو نەتەوە هوشیارەیە بەبڕیارێكی لەم جۆرە كە بەهیچ شێوەیەك جێگەی قەبووڵكردن نییە سەرقاڵ ناكرێت و پرسە گرنگەكانی نەتەوەیی خۆی هەمیشە لەسەرووی هەموو شتێكەوە دەبینێت و هوشیارانە مامەڵە لەگەڵ پێشهات و رووداوە سیاسی و دوژمنكارەكاندا دەكات و هەركاتێكیش ناوچە دابڕاوەكان هاتنەوە سەر هەرێم ئیدی وەك چۆن لە هەولێرو سلێمانی ئاڵای كوردستان دەشەكێتەوە ئەوكاتە لە خانەقین و كەركووك و تەواوی ناوچەكانی كوردستان بی هیچ بەربەستێكی عەرەبی و سیاسی دەشەكێتەوەو هەروەها پێویستە بەرپرسانی كورد لە بەغدا ئەوە بۆ لایەنی عێراقی و بەتایبەتی لیستی دەوڵەتی یاسا كە مالیكی سەرۆكایەتی دەكات روون بكەنەوە مادام هەرێمی كوردستان لە دەستووردا دانی پێدانراوە كەواتە ئاڵاكەشی فەرمییەو وەك ئاڵای عێراق ئەویش ئاڵای عێراقەو دەكرێت لەسەر باڵەخانەكانی بەغداو بەسڕەش لەتەك ئاڵای عێراقدا هەڵبكرێت.تێبینی: ئەم وتارە لە ژمارە3901ی رۆژی 18/10/2011 ى رۆژنامەی خەبات بڵاوبۆتەوە |
