یه‌کێتی زانایانی ئاینی ئیسلامی کوردستان
كوردى | العربية ئێمە لە فەیسبوک په‌یوه‌ندی  |  لقه‌کان  |  ستافی کار  |  لینکی پێویست
*****    *****   سەرۆکی یەکێتی زانایان: هەڕەشەو بێڕێزیکردن بەرامبەر مامۆستایانی ئایینی قابیلی قبوڵ نیە    *****    *****   لقی سۆرانی یەکێتی زانایان کۆدەبێتەوە چەند پرسێک گەنگەشە دەکات    *****    *****   لقی رانیەی یەکێتی زانایان کۆبوونەوەی ئاسایی خۆی ئەنجام دەدات و چەند پرسێک تاوتوێ دەکات    *****    *****   کونسوڵی گشتی فەرەنسا لەهەرێمی کوردستان سەردانی مەکتەبی تەنفیزی یەکێتی زانایان دەکات    *****    *****   دكتۆر شێخ تەها ئەحمەد ئەلزەیدی  ئەندامی كۆڕبەندی فیقهی عێراق: زانایانی كورد پێشەنگ بوون لە گۆڕەپانی زانستی و فەتوادان؛ به نووسین و پۆلێنبەندییەكانیان كتێبخانەی ئیسلامی و مرۆڤدۆستییان دەوڵەمەند كردووە    *****    *****   دكتۆر شێخ تەها ئەحمەد ئەلزەیدی ئەندامی كۆڕبەندی فیقهی عێراق: زانایانی كورد پێشەنگ بوون لە گۆڕەپانی زانستی و فەتوادان؛ به نووسین و پۆلێنبەندییەكانیان كتێبخانەی ئیسلامی و مرۆڤدۆستییان دەوڵەمەند كردووە    *****    *****   ئەنجومەنی باڵای فەتوا: ڕێژه‌ی زه‌كات و سه‌رفیتره‌و فیدیه‌ی ساڵی 1445هـ = 2024م دیاری دەکات    *****    *****   یەکێتی زانایانی ئایینی ئیسلامی کوردستان بەبۆنەی هاتنەوەی مانگی پیرۆزی رەمەزان پەیامێکی پیرۆزبایی بڵاودەکاتەوە    *****    *****   مامۆستا مەلا ياسين چیوەیی کۆچی دوایی کرد یەکێتی زانایان پرسەنامەیەک ئاراستەی خانەوادەکەی دەکات    *****    *****   لقی شقلاوەی یەکێتی زانایان پێشوازی لە شاندێکی وەزارەتی ئەوقاف و میوانان دەکات    *****    *****   لقی شێخانی یەکێتی زانایان لەگەڵ لێژنەی فەتوا کۆبوونەوەیەکی پەیوەست بە مانگی رەمەزان ساز دەکات    *****    *****   لقی هەڵەبجەی یەکێتی زانایان لەپێشوازی مانگی پیرۆزی ڕەمەزاندا مەراسیمێک ساز دەکات   
د. حميد باڤی
به‌رواری دابه‌زاندن: 09/01/2023 : 13:21:58
قه‌باره‌ی فۆنت
سالڤەگەرا (١٧ێ) یا شەهیدبوونا (مەلا محمد مزوری)

سالڤەگەرا (١٧ێ) یا شەهیدبوونا (مەلا محمد مزوری) (١٩٣٢- ٨/ ١/ ٢٠٠٦ێ)

 

مەلا محمد مزوری (١٩٣٢- ٨/ ١/ ٢٠٠٦)

دینەمویا (ئێکەتیا زانایێن ئایینی) بوو! ئەو شەهیدێ نە هێتە ژبیرکرن !

- ماموستایێ خەباتکەر خودێ ژێ رازی: شەهید (محمد مەلا عثمان صوفی عبد الرحمن فەقو- ناسیار ب: مەلا محمد مزوری) ژ دایکبوویێ سالا (١٩٣٢ێ) بوو ل (گوندێ پێندرو) ل دەڤەرا (مزوری ژوریا)، ژ مالباتەکا مەلا وئولدار ودیار وبەرنیاس ودلسوز وکوردپەروەر وخزمەتکار (بابکێ سێنا)، مەلا محمد مزوری (٢) خویشک و(٢) برا هەبوون (بەرێزان: سهیلة (١٩٤٥)– دەیکا طاهر، و حلیمة (١٩٤٦)- دەیکا صلاح، وخودێ ژێ رازیان: حجی عبد الله (١٩٤١- ٣ /٢٠٠٦)- بابێ ماموستا عبد الخالق، و حجی عبید (١٩٤٤-٢٠١١)- بابێ عمر).

- ماموستا (مەلا محمد مزوری) قوناغا زاروکینیێ ل (گوندێ پێندرو) یا بوراندی، ول بەر دەستێ بابێ خوە خودێ ژێ رازی: (مەلاعثمان عبد الرحمن فەقو ١٨٩٩- ١٩٦٢) و ل نیک زانایێ مەزن وب ناڤ ودەنگ وبەرنیاس خودێ ژێ رازی: ماموستا (مەلا ممدوح مەلا سلیم مەلا نجم الدین ئیدلبی- مزوری ١٩٢٨- ٢٠٢٠)ی (جوزیکا ئەلیف وبێ) وقورئانا پیروز یا خواندی، ویێ د گەل مەلایێن مزگەفتان و ماموستایێن ئایینی رابووی، وپشتی (ئێکەتیا زانایێن ئایێنێ ئیسلامێ) هاتیە دامەزراندن (ل ٢٠ /٩ /١٩٧٠) وهەتا روژا شەهید بووی هەمی ژیانا خوە دگەل رێکخستن وزانا وئەندامێن وی بوراندیە لەوما شارەزاییەکا هەرە باش هەبوو و ئەوی بخوە پەرتوک د خواندن وخوە فێردکر وپێ دگەهاند- بێ بچیتە بەر فەقیاتیێ وپەرتوکێن رێزی بخوینیت ل دەف ماموستایان ل دویف سیستەمێ خواندنگەهێن ئایینی-.

- بابێ (مەلا محمد مزوری) زانایێ ب ناڤ ودەنگ و خودان باوەرناما مەلاتیێ (١٢ علم) خودێ ژێ رازی ماموستا (مەلا عثمان عبد الرحمن فقو پێندرویی) پێوەندیەکا زور خورت وموکم د گەل رێبەرێ کوردستانێ خودێ ژێ رازی: (مەلا مصطفی بارزانی ١٩٠٣-١٩٧٩) هەبوو بەلێ ژ بەر هندەک کاودانێن تایبەت مالا خوە ژ (گوندێ پێندرو) بارکر ل سالا (١٩٦٠ێ) وچوو (گوندێ شێخانوکێ) ل دەڤەرا سورچیا ل (ئاکرێ) و کوڕێن وی ژی پشتی وی هاتنە دەف ل شێخانوکی، وخودێ ژێ رازی: ماموستا مەلا عثمان پێندرویی ل سالا (١٩٦٢ێ) ل (شێخانوکێ) وەغەرا دویماهیکێ کر د ژیێ (٦٣ێ) سالیێ دا، وتەرمێ وی پیروز ل وێرێ هاتە ڤەشارتن... ئێنا کوڕێن وی مالا خوە ژ وێرێ بارکر پشتی وەغەرا بابێ خوە وچوونە (باژێرێ مویسل) و بو خوە (دوکانەک) ڤەکر وبازرگانی وکاسبکاری کر و رەوشا وان یا دارایی زور زور خوەش وباشبوو، وماموستا (مەلا محمد مزوری) د ناڤبەرا سالێن (١٩٦٥-١٩٦٩ێ) دا (٢) جاران سەفەرا مالا خودێ کر وچوو (حەجی) هەروەسا برایێن وی ژی.. کە هەمیان ژی زور پێک دخووشبوون ول گەلێک د باشبوون وگوهداریا برایێ خوە یێ مەزن خودێ ژێ رازی: (مەلا محمد مزوری) دکر .

- ل سالا (١٩٦٩ێ) خودێ ژێ رازی: (مەلا محمد مزوری) گەهشتە ناڤ رێزێن شورەشا ئەیلولێ (١٩٦١-١٩٧٥ێ) ودگەل ماموستایێ مەزن وب ناڤ ودەنگ وبەرنیاس وشورەشگێر خودێ ژێ رازی: (مەلا حسین یوسف عبد القادر مارونسی ١٩٠٩- ٢٠١٢ێ) خەبات کر وبەردەوام د گەلدا بوو پشتی رێکەفتنا (١١ی ئادارا ١٩٧٠ێ) ژی، و رول هەبوو د دامەزراندنا (ئێکەتیا زانایێن ئایێنی ئیسلامێ ل کوردستانێ) ل (٢٠/٩/١٩٧٠ێ)، ول مویسل و ل زاخو خەباتا شورەشێ وخزمەتا ماموستایێن ئایینی دکر هەتا دووبارە لەشکەرێ عیراقێ شەڕێ شورەشا کوردستانێ وپێشمەرگەهی کری (ل ئادارا سالا ١٩٧٤ێ)، وبەرگری هاتە کرن، بەلێ مخابن رێکەفتنا خیانەتکاری ل جەزائیر هاتە مورکرن (ل ٦/ ٣/ ١٩٧٥ێ) د ناڤبەرا شاهێ ئیرانێ وصدامی دا ب پشتەڤانیا ئەمریکا، ئینا بەرهنگاریا لەشکەری وخوەڕاگریا چەکداری راوەستا وشورەش کەفتە د کراسەکێ تەنگاڤ دا ود قوناغەکا نووی دا، وزور سەرکردا وفەرماندا وپێشمەرگەها قەستا روژ هەلاتێ کوردستانێ کر وچوونە (ئیرانێ)، دەمەکێ ل (نەغەدە) بوو، پاشی ل سالا (١٩٧٦ێ) خودێ ژێ رازی: (مەلا محمد مزوری) چوو ل نێزیک بارزانیێ نەمر (مەلا مصطفی) ل (کەرەج) ئاکنجی بوو ل نێزیکی (طھران) پایتەختێ ئیرانێ، وپشکەک ژ خێزانا وی ل سالا (١٩٨١) گەهشتنێ ل روژهەلاتێ کوردستانێ.

- خودێ ژێ رازی: (مەلا محمد مزوری) دەمێ چوویە ئیرانێ ل سالا (١٩٧٥ێ) ژ خێزان و زاروک ومالباتا خوە ڤەقەتیا بوو ویێ بتنێ بوو، وب ئەگەرێ ڤێ رەوشا نە جهگیر ژ بەر شورەشێ وڤەگوهاستنێ ژ جهەکی بو ئێکێ دی د ناڤ بەرا دەڤەرا مزوریا و باژێرێ مویسل ودەڤەرا رزگارکری د شورەشێ دا وئاوارەبوونێ ل ئیرانێ (مەلا محمد مزوری) نەچار کر (ژ مەجبوری) نە ژ خوشی- وەکی وی بخوە دگوت- سێ جاران ژیانا هەڤژینیێ پێکبینیت د ژیانا خوە یا گەڕوک و نەجهگیر دا :

1- جارا ئێکێ ل سالا (١٩٥٣ێ) ل (گوندێ پێندرو) د گەل خانما خودێ ژێ رازی : لیلی تمر سلیم ستوپەی (١٩٣٠-٢٠٢٢).


2- جارا دووێ ل سالا (١٩٧٠ێ) ل (باژێرێ مویسل) د گەل خانما خودێ ژێ رازی : سلمى عبد القادر محمد أمین بوتی (١٩٤١-٢٠٢٢) .

3- جارا سیێ ل سالا (١٩٧٦ێ) ل (ئیرانێ) د گەل خانما بەرێز : نائلة إسماعیل رضا گوران (١٩٦٦).

وژ هەرسێکا خودێ (٩) کچ و(٦) کوڕ دانێ (بەرێزان:

1- دکتور محمد شریف (١٩٥٦ێ) نوکە ماموستایە ل کولیژا شەریعەتی ل زانکویا صلاح الدین ل هەولێرێ.

2- دکتور أیوب (١٩٦٦ێ) نوکە ماموستایە ل کولیژا شەریعەتی ل زانکویا صلاح الدین ل هەولێرێ.

3- بەرێز: رقیب (١٩٧١) نوکە ل (دانیمارک) دژیت.

4- بەرێز: نقیب (١٩٧٣) نوکە ل (دانیمارک) دژیت.

5- دکتور ناصح (١٩٧٩) پێشنڤێژ وپەیڤخوینێ (مزگەفتا زانین)ە ل دهوکێ .


6- بەرێز: مصلح (١٩٨٣) فەرمانبەرە ل ئەوقافا دهوکێ.

کە هەمی ژی کەسێن خویندەڤان ورەوشەنبیر وزانا و ئولدار و جامێر و خزمەتکارێن جڤاکێ خوە و خوەگوریکەرێن وەلات ومللەتی نە، و خودان باوەرنامێن بلندن ... خودێ ژیێ هەمیان درێژ بکەت وبپارێزیت.

- خودێ ژێ رازی: پێشمەرگەهێ شورەشا ئەیلول وگولانێ (مەلا محمد مزوری) کەسەکێ زور چالاک وڕاهاڤێژ بوو د ناڤ رێزێن (ئێکەتیا زانایێن ئایینێ ئیسلامێ) هەر ژ روژا دامەزراندنا وێ و هەتا وەغەرکرنا وی... چ ل مویسل و ل زاخو، وچ ل ل دەڤەرێن رزگارکری ود ناڤ شورەشێ دا، وچ روژهەلاتێ کوردستانێ وئیرانێ پشتی ئاوارەبوونێ، وچ ل هەولێرێ ول دهوکێ پشتی سەرهلدانێ (ل ئادارا ١٩٩١ێ)، کە بەردەوام خەبات د کر وجهێ رێزەکا مەزن بوو ل دەف سەرکردایەتیێ بتایبەتی خودێ ژێ رازی: شەهید إدریس بارزانی (١٩٤٤- ١٩٨٧ێ) وبەرێز: سەروک مسعود بارزانی... لەوما ئەندامەکێ زور چالاک بوو وخودان رولەکێ کاریگەر بوو بو گرێدانا پێوەندیێن ئێکەتیێ دگەل کەسایەتیان وئالیان وژ بو پشتەڤانیا ئێکەتیێ ژ بەر هندێ ژی سەرپەرشت ورێبەرێ ڤەژاندنا (ئێکەتیا زانایێن ئایینی) ل سالا (١٩٨٠) ل (کومەلگەها زێوە) ل (روژهەلاتێ کوردستانێ)، ول کونگرێ ئێکەتیێ یێ سالا (١٩٩٣ێ) ببوویە (ئەندامێ دەستەیا کارگێریا ئێکەتیێ) ل هەولێرێ، هەروەسا ببوویە (جێگرێ سەروکێ ئێکەتیا زانایێن ئایینی- تایێ دهوکێ) هەتا روژا شەهید بووی، ورولەکێ مەزن وکاریگەر د گێڕا ورێزەکا مەزن لێ د هاتە گرتن ژ لایێ ئێکەتیێ و دەستهەلاتێ ڤە .

- ل ئەلندا روژا (٨/ ١/ ٢٠٠٦ێ) بەری (١٧) سالان نڤێژا خوە یا سپێدێ کر وئەو وسەروکێ ئێکەتیا زانایێن ئایینی ل دهوکێ بەرێز: مەلا إسلام إبراهیم بازید، وبەرێز شێخ شمس الدین شێخ طاهر شوشی بو کومبوونەکێ ژ دهوکێ چوون بەرەف هەولێرێ ب ترومبێلا ئێکەتیا زانایان ودونیا یا گرتی بوو و مژێ رێک گرت بوو ئینا پشتی ژ (بەرطلە) بورین ب (٥) کیلو میترا و(٢) کیلو میترا بەری پرا خازری زێرەڤانێن کاروانێ قونسلێ ئەمریکا ل کەرکوکی دەمێ ژ مویسل د هات و بوری... ترومبێلا وان گولەباران کر وگولەیەک ببەر خودێ ژێ رازی (مەلا محمد مزوری) کەفت ئێکسەر ناڤێ خودێ وپێغمبەری (س.خ) ئینا وشەهدە دا و شەهید بوو ... وتەرمێ وی یێ پیروز برە کەلەکێ وهەولێرێ وسەرکردایەتی وهەمی ئالی هاتنە سەر خەت ودەنگڤەدانەک مەزن پەیدا بوو، وبەرپرسێن دەڤەرێ وراگەهاندن وژمارەیەکا زور ژ مەلا وماموستایێن ئایینی وخەلکێ دەڤەرێ ئامادەبوون وپشتی تەرمێ وی یێ پیروز ل مزگەفتێ هاتیە شویشتن وکفنکرن ونڤێژلسەرکرن ل گورستانا (بەحرکێ) هاتە ڤەشارتن د سەقایەکێ سار وبارانی دا - کە پڕانیا کەس وکارێن وان ل وێرێ د ئاکنجینە- وتازیا وی (٣)ێ روژان هاتە دانانێ وخەلکەکێ زور ژ وەلاتیان ومەلایان و بەرپرسان پشکداری تێدا کر وەک رێزگرتن بو خەباتا وی یا درێژ وپاقژ یا ئایینی وکوردایەتیێ، ورێزدار سەروک (مسعود بارزانی) زور خەمگین بوو ب شەهیدبوونا خەباتکەر وپێشمەرگەهێ شورەشا ئەیلولی وگولانێ .. چونکو وەک ماموستایەکێ ئایینی رولەکێ مەزن هەبوو د بزاڤا رزگارکرنا گەلێ کوردستانێ ود خزمەتکرنا ئایینی ئیسلامێ دا- وەکی د پەیامەکا بەرێزی دا هاتی- و ئەمریکا ژی داخوازا لێبورینێ ژ گەلێ کوردستانێ وژ حکومەتا هەرێمێ کر بوو .

- خودێ ژێ رازی: (مەلا محمد مزوری) جهێ باوەریا سەرکردایەتیێ بوو، لەوما شەهید (إدریس بارزانی) وەک نوینەرێ خوە فرێکرە ناڤ ئاوارەیێن کورد ل ئیرانێ ژ بو گەهاندنا پەیاما کوردایەتیێ وبو رێکخستنا رێزێن مەلا وماموستایێن ئایینی وچالاککرنا (ئێکەتیا زانایێن ئایینی) ل دەستپێکا سالێن هەشتیان.

- خودێ ژێ رازی (مەلا محمد مزوری) ومالباتا وی کەسێن زور د راستگوو و جامێر وئولدار وچاک وقەنجن، مروڤێن وەفادار ودلسوز وکوردپەروەرن، مالباتەکا دونیادیتی ومەرد وناندەهـ وخێرخواز ومێهڤانحەوینن، جڤاکدوست وهەڤالشرینن، مەلا محمد مزوری ژ بو خودانکرنا خێزانا خوە - د بەر ئەرکێن خوە یێن ئێکەتیا زانایێن ئایینی- کاسبکاریا جودا جودا دکر، ماوەیەکی کڕین وفروتنا زێری کر دا زارویێن خوە پێ خودان بکەت.

- هەڤال ونیاسێن خودێ ژێ رازی (مەلا محمد مزوری) زور بباشی بەحسێ وی دکەن وپەسنا وی ددەن وەک کەسەکێ جامێر وچالاک ودەستپاک و کوردپەروەر... بوو نموونە...

1- بەرێز: مەلا إسلام گوهەرزی (١٩٤٨ێ) دبێژیت: مروڤەکێ زانا وتێگەهشتی وشارەزا بوو، فەرماندە ورێبەر بوو، خودان ئاخفتن وبریار بوو، ئەو تشتێ وی دڤیا دا کەت ویێ نە ڤیابە نە د هاتەکرن، زور زور یێ ب پێوەندی وبەرنیاس بوو، مروڤەکێ راستگوو ودەق ودەق بوو، ژ کەسێ نە ددا پاش ژ بو رێکا خودێ وکوردایەتیێ، ونەز ژ تێکڤەدانێ وکوتلانێ ومروڤێن خراب نەدکر وزور جاران د روویێ وان دا پاشڤەدبرن، مروڤەکێ مەرد وناندەهـ ودونیادیتی بوو، لەوما من رێزەکا مەزن لێ دگرت ول هەمی جهان ود هەلکەفتان دا من ددا پێشیا خوە، کەسەکێ زور جامێر وئولدار وچاک بوو، زور حەز ژ مەلا وئەهلێ زانستی وئایینی ومزگەفتان دکر، بەڕەڤانیەکا مەزن ژ ئایینی خودێ و ژ دوزێن کوردایەیتیێ دکر.. جهێ وی بەهشت بیت).

2- بەرێز: مەلا وەلی أحمد دری (١٩٦٤) دبێژیت: (پشتی شورەشا ئیسلامی ل ئیرانی هندەک بەرفرەهی بو ئاوارێن کورد پەیدا بوو.. ئینا سەرکردایەتیا شورەشێ بریار دا ب ڤەژاندنا (ئێکەتیا زانایێن ئایینی) ولژنەیەکا ئامادەکاری پێکئینا ژ خودێ ژێ رازیان: مەلا محمد مزوری، ومەلا علی بێسکی، ومەلا محمد طوری... وهاتنە (کومەلگەها زێوە) کارێ رێکخستنا مەلایان کر، ومەلا علی وەک قازیێ شەرعی بوو ومەلا محمد طوری باراپتر ل بارەگایی بوو چونکو خێزانا وی د گەل دا نەبوو، ومەلا محمد مزوری پتر سەرپەرشتیا کار وبارێن ئێکەتیێ دکر وپێوەندیێن وێ ب رێڤە دبرن ورولێ سەرەکی وکاریگەر وی دگێرا وئەو بوو ئەگەرێ ئێکێ بو ڤەژاندنا ئێکەتیێ، پاشی د قوناغێن پشتی هینگێ دا هەتا سەرهلدانێ (١٩٩١ێ) زێدەباری ڤان هەرسێ ماموستایان چەندین مەلایێن دی ئەوێن ل ناڤ شورەشێ وهاتینە ئیرانێ هاتنە د ناڤ ڤان لژنێن کار وبارێن ب رێڤەبرنا (ئێکەتیا زانایێن ئایینی) دا ژ وانا بو نموونە: خودێ ژێ رازیان، مەلا عبد الرحمن میرسەر داواتی دڕی، مەلا عبد الکریم خوشناو، مەلا فاضل یاسین مەلا محمد دڕی، مەلا محمد أمین وەرتی، مەلا حسن محمد شریف حامد چێی، مەلا محمود دێرشەوی، وبەرێزان: مەلا أحمد یوسف، مەلا إسلام إبراهیم بازید، مەلا رسول شێخ رسول گەزنەیی، مەلا سرحان حسین میکائیل دڕی، مەلا عصمت إسلام محمد گوهەرزی، مەلا طە أبابکر شەمزینی، مەلا ولی أحمد دری...، وداکوکیێ دکەت و دبێژیت: مەلا محمد مزوری ئەگەرێ سەرەکی یێ ئێکێ وکارەکتەرێ سەرەکی یێ ڤەژاندنا (ئێکەتیا زانایێن ئایینی) بو ل سالا (١٩٨٠ێ) ب پشتەڤانیا شەهید إدریس بارزانی (١٩٤٤-١٩٨٧ێ).

3- بەرێز: مەلا طه أبابکر شەمزینی (١٩٥٩) د بێژیت: مەلا محمد مزوری کەسەکێ جامێر وباش بوو، رولەکێ کاریگەر هەبوو د ڤەژاندنا (ئێکەتیا زانایێن ئایینی) دا ل روژهەلاتێ کوردستانێ ل سالا (١٩٨١ێ) ژ بەر پێوەندیێن وی یێن بەرفرەهـ وناسینا وی بو خەلکی وکاربدەستان، چونکو ڤەژاندنا (ئێکەتیێ) ب دلێ حکومەتا ئیرانێ نە بوو ورەوشا دەڤەرێ ژی نە یا ل بار بوو، لەوما ب شیان وب رولێ مەلا محمد مزوری وهەڤالێن وی (ئێکەتیا زانایێن ئایینی) هاتە ئاڤاکرن وب رێکا وی هاریکاری بو د هات وپشتەڤانی لێ د هاتە کرن...).

4- ماموستا شێخ شمس الدین شوشی (١٩٥٤) دەربارا (مەلا محمد مزوری) د گوت: (کەسەکێ زور جامێر وخیرخواز بوو ب مالبات ڤە (برا وکوڕ) وهەکە روژەکێ چ مێهڤان بو نە چووبانە دا ئێکی ژ مزگەفتێ دگەل خوە بنە مالێ هندی هند د مێهڤان حەوین و ووج قەتین وجڤاکدوست ومروڤشرین بوون).

5- دکتور مێرخان مەلا نبی گەرماڤی (١٩٥٧ێ) دبیژیت: مەلا محمد مزوری مروڤەکێ گەلەک جامێر وچاک وسوحبەتخوش بوو، مالا وان ل (مویسل) مالا هەمی خەلکێ کوردستانێ بوو، خەلکەکێ زور قەست دکرێ ژ دهوکێ وهەولێرێ وسولەیمانیێ ل سالێن (شێستان وحەفتیان) ژبەر جامێری وناندەهیا وان، مالا وان وەکی هوتێلێ بوو، ومەلا محمد مزوری وبرایێن وی وعەیالێ وان هەمیان هندی دونیایکەکێ کەیفا خوە ب مێهڤانان دئینا ورێزەکا هەرە مەزن لێ دگرت... وپشتی مەلا محمد مزوری گەهشتیە شورەشێ رژێما بەعسیا گڤاشتێن زور مەزن ئێخستنە سەر برایێن وی و مالا وان بگشتی وچەندین جار گرتن وزیندانکرن وزور ئێشاندن هەتا خودێ ژێ رازی حەجی عبید مزوری ژ نەچاری خوە قورتال کر و چوو هەولێرێ خوە ڤەشارت ژ پێشچاڤێن حکومەتا عیراقێ ..).

6- سالم مەلا إبراهیم ئێکمالەیی (١٩٧٦ێ) د بێژیت: (دەمێ هێزێن ئەمریکا ترومبێلا (ئێکەتیا زانایێن ئایینی) گولەبارانکری پیچەکێ دونیا مژ بوو ئەم ژ بەرطلە د چووین بەرەف پرا خازری وخودێ ژێ رازی مەلا محمد مزوری د سینگێ ترومبێلی دا بوو ب رەخ من ڤە ومەلا إسلام وشێخ شمس الدین د پشتێ دا بوون، وئەمریکی نێزیکی ٣٠٠ میتران ژ مە د دویر بوون، و(١٠) گولە بەردانە مە (٩) ب ترومبێلێ کەفتن وژ کار کەفت وئێک ب ئاخێ کەفت، ومەلا محمد مزوری ئێکسەر شەهید بوو، ومە ب پیکەمەکێ تەرمێ وی یێ پیروز گەهاندە کەلەکێ وژ وێری ب ئیسعافێ گەهاندە نەخوشخانا تەنگاڤیان ل هەولێرێ... پاشی رێورەسمێن ئایینی بو هاتنە کرن ول (بەحرکێ) هاتە ڤەشارتن وتازیا وی هاتە دانان...، وگوت: مەلا محمد مزوری مروڤەکێ زور جامێر وچاک بوو، زور کار بو خەلکی دکرن بێ جودایی، کە هەر کەسەکێ خوە هەوەجە کربایێ نە د گوتێ: نە، وهەر کارەکێ ئەوی ڤیابایە دشیا بدەستخوەڤە بینیت ل کوردستانێ...).

- د ڤێ خواندنێ دا بو ژیان و رول ورفتار وکریارێن خودێ ژێ رازی: (مەلا محمد مزوری) چەند خال بو مروڤێ دیار دبن .. ژ وانا:

1- مەلا محمد مزوری وەکی پڕانیا مەلایێن کوردا دگەل هەلگرتنا چرایێ گەشێ پەیاما ئایینێ ئیسلامێ یێ پیروز هەلگرێن پایاما کوردایەتیەکا ڕاستگوو وپاقژ وبژوین ودلسوز وبێ بەرژەوەندیێن کەسوکی و تایبەت بوون .

2- مەلایێن کورد پشکداری یا د هەمی قوناغێن خەباتا کوردایەتیێ دا کری چ خووش وچ نەخوش، چ د ئاشتی دا وچ د شورەشێ، چ ب قەلەمی وچ تڤەنگێ، چ برێکا ئایینی وقورئانا پیروز، وچ برێکا مافێن مروڤی وهاندانا جڤاکێ خودان سوز.

3- رولێ (ئێکەتیا زانایێن ئایینێ ئیسلامێ)- ئەوا هاتیە دامەزراندن ب پشتەڤانیا رێبەرێ مەزن (مەلا مصطفی بارزانی)- زور یێ کاریگەر ومفادار وپشتەڤان بوو بو شورەشێ، لەوما پێدڤییە ئەڤروکە ژی وی رولێ پشتگیریا مافێن مللەتی بگێریت وباشتر.

4- مەلا محمد مزوری ئەگەرێ سەرەکی بوو و رولەکێ سەرەکی هەبوو بو ڤەژاندنا (ئێکەتیا زانایێن ئایینی) ل سالا (١٩٨٠) ل روژهەلاتێ کوردستانێ.

5- مەلا محمد مزوری پڕانیا ژیانا خوە د قوناغێن دەربدەریێ وڤەگوهاستنێ وشورەشێ وئاوارەبوونێ دا بوراندیە دویر ژ خێزان ومالبات وکەس وکارێن خوە .

تێبینی: بو ئامادەکرنا ڤان پێزانینان مفا هاتیە وەرگرتن ژ:


1- مالباتا خودێ ژێ رازی بخوە بتایبەتی بەرێز: (د. ناصح مەلا محمد مزوری).


2- بەرێز: ماموستا مەلا إسلام گوهەرزی (١٩٤٨ێ) د چەند پێوەندیێن تەلەفونی دا ل (٦ /١/ ٢٠٢٣).

3- بەرێز: شێخ شمس الدین شێخ طاهر شوشی (١٩٥٤ێ) د پێوەندیەکا تەلەفونی دا ل (٦ /١/ ٢٠٢٣).

4- بەرێز: دکتور میرخان مەلا نبی صالح گەرماڤی (١٩٥٧ێ) د پێوەندیەکا تەلەفونی دا ل (٦ /١/ ٢٠٢٣).

5- بەرێز: مەلا طه أبابکر شەمزینی (١٩٥٩) د پێوەندیەکا تەلەفونی دا ل (٦ /١/ ٢٠٢٣).

6- بەرێز: مەلا وەلی أحمد دڕی (١٩٦٤ێ) د پێوەندیەکا تەلەفونی دا ل (٦ /١/ ٢٠٢٣).

7- بەرێز: سالم مەلا إبراهیم مەلا محمد طاهر ئێکمالەیی (١٩٧٦ێ) د پێوەندیەکا تەلەفونی دا ل (٦ /١/ ٢٠٢٣).