له دیمانه‌یه‌كی ته‌له‌فزیۆنی زاگرۆس مه‌لا نه‌جمه‌دین وادی ئه‌ندامی مه‌كته‌بی ته‌نفیزی یه‌كێتی زانایان گووتی: ئێمه وه‌ك یه‌كێتی زانایان له یه‌كه‌م رۆژه‌وه به‌وپه‌ڕی جددیه‌وه به ئه‌ركی سه‌رشانی خۆمان هه‌ڵستاین‌و، كارمان بۆ ئه‌وه كرد، كه خۆپیشاندانی شاری سلێمانی له چوارچێوه‌ی یاسایی‌و رێڕه‌وی خۆی ده‌رنه‌چێت.
سه‌باره‌ت به‌وه‌ش بۆچی شه‌وی یه‌كه‌م سه‌ردانی لقی چواریان كردووه وادی گووتی: كێشه‌كه له‌گه‌ڵ لقی چوار دروست بوو، به‌ڵام ئێمه سه‌ردانی ئاساییش‌و سه‌رۆكی حكومه‌تیشمان كرد، داوامان لێیان كرد، كه وریا بن‌و نه‌هێڵن كه‌سانی ناحه‌ز ئه‌م ده‌رفه‌ته بۆ خۆیان بقۆزنه‌وه.
هه‌روه‌ها ئه‌و ئه‌ندامه‌ی مه‌كته‌بی ته‌نفیزی یه‌كێتی زانایان گووتی: ئه‌و كاتی داوامان له هاووڵاتیان كرد، ئێستاش داوایان لێده‌كه‌ین: هێمنی بپارێزن‌و كاره‌كانیان به پێی یاسا بێت، داواش له حزب‌و لایه‌نه‌كان ده‌كه‌ن به پیر خواسته‌كانی جه‌ماوه‌ره‌وه بچن‌و، هه‌وڵبده‌ن له ناخی جه‌ماوه‌ر بژین.
وادی هه‌روه‌ها گووتی: دوێنێ له به‌یاننامه‌یه‌كدا هه‌شت داواكاریمان خسته به‌رده‌م لایه‌نی په‌یوه‌ندیدار، له‌وانه هه‌موو لایه‌ك هه‌وڵبده‌ن بۆ هێوركردنه‌وه‌ی بارودۆخی سلێمانی، ته‌حقیق بكرێت له سوتاندنی باره‌گای لقی چوار بۆ ئه‌وه‌ی هۆكاره‌كه‌‌و لایه‌نی تاوانبار بزاندرێت، هه‌روه‌ها كشانه‌وه‌ی ئه‌و هێزانه‌ی له ده‌ره‌وه‌ی سلێمانی هاتوون، چونكه له ناو سلێمانی بایی ئه‌وه‌نده هێز هه‌یه پارێزگاری بكات، خۆشبه‌ختانه ئه‌وه‌ش جێبه‌جێ كرا، هه‌روه‌ها ئازادكردنی گیراوه‌كان، ئه‌وه‌ش دیاره جێبه‌جێ كرا، هه‌روه‌ها قه‌ره‌بووكردنه‌وه‌ی زیان لێكه‌وتووان جا لقی پارتی بێت یان كه‌سێكی تایبه‌تی یان هه‌ر لایێكی دیكه، داواشمان كرد لایه‌نه‌كان دان به‌خۆدابگرن بۆ هێوركردنه‌وه‌ی دۆخه‌كه‌‌و، داواشمان له هاووڵاتیان كرد، كه داواكاریه‌كانیان به شێوه‌یه‌كی شارستانی‌و سه‌رده‌میانه بێ‌‌و، دوور له توند‌وتیژی‌و زیان گه‌یاندن.
سه‌باره‌ت به‌و قسه‌یه‌ش، كه هه‌ندێك له راگه‌یاندنه‌كان وایان بڵاوكرده‌وه، كه یه‌كێتی زانایان پشتیوانی له خۆپیشاندانه‌كان ده‌كه‌ن، وادی روونی كرده‌وه، رای ئێمه ئه‌و به‌یاننامه‌یه، كه باسمان كرد، ئێمه ئێستاش پشتیوانی له خۆپیشاندان ده‌كه‌ین، به‌ڵام به هێمنی‌و شارستانی، نه‌ك نانه‌وه‌ی پشێوی‌و ناخۆشی، بۆ ئه‌وه‌ی هیچ ده‌ستێكی ده‌ره‌كی به قازانجی خۆی نه‌یگۆڕێت.
| 
