به‌ناوى خواى به‌خشنده‌ى میهره‌بان

[ وأطيعوا الله ورسوله ولا تنازعوا فتفشلوا وتذهب ريحكم وأصبروا إن الله مع الصابرين ]


جه‌ماوه‌رى رِه‌نجدیده‌ى گه‌له‌كه‌مان . .

كاربه‌ده‌ستان و لایه‌نه‌ سیاسیه‌كان . .

رِێكخراوه‌كانى كۆمه‌ڵگاى مه‌ده‌نى . .

سڵاوى خواتان لێبێت . . .

بیست سال به‌ر له‌ ئێستا، رِژێمێك له‌سه‌ر دڵى ئه‌م خاك و نیشتمانه‌ چۆكى دادابوو، به‌ هیوا بوو تا دوا دڵۆپى خوێنى رِۆڵه‌كانى ئه‌م گه‌له‌ و تا دوا گه‌ردیله‌ى خێر و بێرى ئه‌م نیشتمانه‌ له‌سه‌ر دڵى ئه‌م خاك و نیشتمانه‌ لانه‌چىَ و نه‌رِوا.

بۆیه‌ له‌هه‌موو لایه‌كه‌وه‌ به‌هه‌موو شێوه‌یه‌ك هاوارى داواكردنى مافه‌كان كرا و گوێیان لىَ نه‌گیرا تا ده‌نگى تۆم ناوىَ خۆشم ناوێى ئازادیم ده‌وىَ بڵندبووه‌وه‌ ده‌سته‌كان رِاوه‌شێندران و په‌نجه‌كان وه‌ك نوكى قه‌ڵه‌م وه‌ك نوكى رِم ده‌ركه‌وتن.

تا ئه‌مرِۆژانه‌یان دروستكرد زۆر هاوار كپ كران زۆر خوێن رِژێنرا زۆر ده‌ست و په‌نجه‌ له‌و پێناوه‌دا له‌گه‌ڵ گه‌ردنه‌كان قرتێندران كه‌واته‌ ئه‌م رِۆژانه‌ گران به‌هان و گران به‌ده‌ست هاتون.

كه ‌ئه‌م رِۆژانه‌ به‌دى هاتن په‌نجه‌كان و ده‌سته‌كان ده‌ستخۆشیان لێكرا و به‌رز نرخێندران جا چ ئه‌و ده‌ستانه‌ى تێكۆشانى چه‌كدارى چ ئه‌و په‌نجانه‌ى قه‌ڵه‌م بوون چ ئه‌وانه‌ى كران به‌چاوى دوژمندا.

دواتر ئه‌و ده‌ست و په‌نجانه‌ په‌رله‌مان و حكومه‌تیان دروستكرد كه‌ ده‌بوو زۆر شت بكرایه‌ و زۆر شتیش نه‌كرایه‌. به‌ڵام تێپه‌رِى.

ئێستاش ئه‌و ده‌ست و په‌نجانه‌ ئه‌و جه‌ماوه‌ره‌ هاوار ده‌كه‌ن و ده‌سته‌كانیان رِاده‌وه‌شێنن په‌نجه‌كانیان بڵند كردۆته‌وه‌ ده‌ڵێن چاكسازیم ده‌وىَ.

دواى هه‌موو هه‌وڵه‌كانمان ده‌ڵێین:

هه‌ردوو سه‌ركرده‌ با بێنه‌ پێشه‌وه‌ سه‌رۆك كۆمار و سه‌رۆكى هه‌رێم كاره‌كان به‌ره‌و ئامانجه‌كانى جه‌ماوه‌ر به‌رن داواكانى جه‌ماوه‌ر بكرێته‌ پرۆژه‌ و جێبه‌جىَ بكرىَ و خه‌مى گه‌ل و ووڵات له‌هه‌موو خه‌مه‌كان گه‌وره‌تر بىَ و ده‌ڵێین جه‌ماوه‌رى گه‌ل بزانن ده‌نگى ئێوه‌ش له‌به‌رامبه‌ر حكومه‌ت و ئه‌زموونى كوردیدایه.‌ هه‌ر زیانىَ له‌م ئه‌زموونه‌ له‌دام و ده‌زگاكانى و دام و ده‌زگاى مه‌ده‌نى بكه‌وىَ برینێكه‌ له‌جسته‌ى ئه‌م ئه‌زموونه‌ ده‌كه‌وىَ زیانه‌ بۆ گه‌ل و نیشتمان و بزانن ئه‌و كه‌سانه‌ى له‌ده‌وره‌ت وه‌ستاون رِۆڵه‌ى ئه‌م گه‌له‌ن براتانن گولَ بده‌ن له‌یه‌خه‌یان ده‌ستتان له‌سه‌ر سنگتان دابنێن تا هێور بن.

ئێوه‌ش رِۆڵه‌كانى گه‌ل پارێزه‌رانى سه‌رومال و ئاسایشى خه‌ڵك ئاگاتان لىَ بىَ ئه‌وانه‌ى به‌رامبه‌رتان هاوار ده‌كه‌ن براتانن برینداریان بكه‌ن ده‌بآ هه‌ر خۆتان خوێنیان پآ بده‌ن.

گه‌ر شه‌هیدبن ده‌بىَ وه‌ك رِێژوان و شێرزاد و سوركێو هه‌موومان بۆیان بگرین.

چاوه‌كانى مێژوو له‌هه‌موو رِۆژانىَ تیژتره‌ با هه‌موو كه‌س له‌خه‌مى گه‌ل و نیشتماندا بێت و هیچى تر.

[ وقل أعملوا فسيرى الله عملكم ورسوله والمؤمنون ]

قسه‌ى پۆشته‌ و په‌رداخ خه‌ڵك لێى بێزار بووه‌ خواى گه‌وره‌ش هه‌رده‌م نه‌یویستوه‌

[ يا أيها الذين آمونا لم تقولون ما لا تفعلون كبر مقتا عند الله أن تقولوا ما لا تفعلون ]

ئیمامى عومه‌ر (ر - خ) ده‌فه‌رموىَ: خێر له ‌ئێوه‌دا نیه‌ كه‌ نه‌یڵێن و خێر له ‌ئێمه‌شدا نیه‌ كه‌ نه‌یبیستین.

ئێمه‌ ووتمان ماوه‌ ئێوه‌ گوێى لێبگرن.

[ فبشر عباد الذين يستمعون القول فيتبعون أحسنة أولئك الذين هداهم الله وأولئك هم أولوا الألباب ]


یه‌كێتى زانایانى ئایینى ئیسلامى كوردستان

لقى سلێمانى

24 / 2 / 2011