ئه‌مڕۆ دوشه‌ممه رێكه‌وتی 1/2/2011 به ئاماده‌بوونی هه‌ریه‌ك له به‌ڕێزان مامۆستا مه‌لا عه‌بدوڵڵا مه‌لا سه‌عید گرتكی سه‌رۆكی یه‌كێتی زانایان‌و، مامۆستا مه‌لا جه‌لال خه‌یلانی جێگری سه‌رۆك‌و، شێخ عه‌بدولباسیت بالیسانی ئه‌ندامی مه‌كته‌بی ته‌نفیزی، ده‌سته‌ی راوێژكاری یه‌كێتی زانایان به مه‌به‌ستی توندوڵكردنی په‌یوه‌ندی نێوان لق‌و ده‌سته‌ی راوێژكاران‌و دیاریكردنی ئه‌رك‌و رۆڵی ده‌سته‌ی راوێژكاران كۆبونه‌وه‌یه‌كیان ئه‌نجامدا.
له لێدوانێكیدا به‌ڕێز شێخ عه‌بدولباسیت بالیسانی به سایتی زانایانی راگه‌یاند: ئه‌مڕۆ له كۆبونه‌وه‌یه‌كدا له‌گه‌ڵ 11 ئه‌ندامی ده‌سته‌ی راوێژكاران كۆبوونه‌وه‌یه‌ك ئه‌نجامدرا، باس له په‌یوه‌ندی‌و هه‌ماهه‌نگی نێوان ده‌سته‌ی راوێژكاران‌و سه‌رجه‌م لقه‌كانی یه‌كێتی زانایان كراو، گرنگی پرسی ئاڵوگۆڕكردنی بابه‌ت‌و، ئاگاداركرنه‌وه‌ی هه‌مه‌لایه‌نه‌ی باس‌و خواسی لقه‌كان له‌گه‌ڵ ده‌سته‌كه به‌رزنرخێنرا.
له به‌شێكی دیكه‌ی لێدوانه‌كه‌یدا به‌ڕێزیان گوتی: له‌میانه‌ی كۆبوونه‌وه‌كه‌دا وێڕای باسكردنی چه‌ندین باس‌و خواسی گه‌رمی ناوچه‌كه‌و كوردستان، ئیدانه‌ی كاره‌ساتی 1ی شوبات كرایه‌وه، كه ئه‌مڕۆ ساڵڕۆژی ئه‌م كاره‌ساته بوو، تیایدا چه‌ندین كه‌سایه‌تی‌و به‌رپرس‌و خه‌ڵكی سڤیل بوونه قوربانی‌و، زانایانی ئاینیش بێبه‌ش نه‌بوون، بۆیه به‌م بۆنه‌یه‌وه جارێكی دیكه ئه‌نجامده‌رانی هه‌ر كارێكی له‌م جۆره، به كه‌سانێكی دوور له ئاین‌و رێزگرتن‌و خۆشویستنی وڵات ناوبران.
شایانی باسه: كۆبوونه‌وه‌كه نزیكه‌ی 2 كاتژمێری خایاندو، سه‌رجه‌م ئه‌ندامانی ده‌سته‌ی راوێژكاری ئاماده‌ی بوون، جگه له 2 ئه‌ندام كه به‌هۆی نه‌خۆشیه‌وه نه‌یانتوانی ئاماده‌ی ببن.
| 
