كەنالی ئاسمانی پەیام وەك كەناڵێكی ئیسلامی كوردی جێگەی رێزو بایەخ پێدانی زۆربەی هەرە زۆری موسلمانانی كوردستانە بەوانەشەوە كە ئاراستەی سیاسی جیاوازیان هەیە لەگەل كۆمەلی ئیسلامید كە خاوەنی كەنالەكەیە, چونكە ئەو كەناڵە ئیسلامیانە خزمەتێكی گەورە بە دین و رەوشتی ئەو میللەتە دەكەن، بەلام لە هەمان كاتدا بە ئەندازەی ئەو ریزو ناوبانگە باشەی تا ئیستا هەیانبووە و ئەو دروشمانەی بەرزیان كردۆتەوە, لە بەردەم بەر پرسیاریەتێكی گەورەش دان .

ئێمە گلەیی ئەو كەم و كوریانەیان لێناكەین كە پەیوەندی بە بواری هونەری و تێچوونی پارەوە هەیە چونكە هەموو خەلك دەزانێ باری دارایی ئەوان و كەناڵەكانی تر وەكو یەك نین و بەراورد ناكرێن. بەلام تێپەرینی هەندێك هەڵەی قەبەو زەبەلاح كەپەیوەندیان بەعەقلیەت و مەنهەجی كاركردن و ئاراستەی كاری كەنالەكەوە هەیە و، دەرك پێكردنی تەنها پیویستی بە هەندێك لێهاتوویی پیشەیی و بیركردنەوەی زیرەكانە هەیە, بەراستی جێگەی لەسەر وەستانە .

بەداخەوە ناوبەناو لە كەنالی پەیامەوە هەندێك بەرنامەی ئەوەندە لارو وێرو بێ سەرو بەر دەبینین كە هیچ كەلێنێك پرناكاتەوە و هیچ تەفسیرێكیش هەڵناگرێ جگە لە بێ بەرنامەیی و نەبوونی ئامانج و ستراتیژێكی روون بۆ كار كردن و، هەڵنەبژاردنی بەرنامەكان بەشێوەیەك خزمەت بە ئیسلام و پەیامی كەنالەكە بكات . هەروەك شەوی یەكشەممە 29/30-12-2012 دیتمان لەو بەرنامەیەی كە سەبارەت بە سەری سال و ئیسلام و مەسیحیەت سازدرابوو مەلایەك و قەشەیەكیان بانگ كردبوو بۆ ئەوەی قسە لەوبارەوە بكەن .

من لە برای پێشكەشكار دەپرسم: پێم نالێی ئەو بەرنامەیە ئامانجی چی بوو؟ بە تەما بوو چی بە خەلك بێ؟ وە لە ئەنجامدا چ ئامانجێكی پێكا؟ تۆ ئەگەر بەتەمای ئەوە بووبی باسی هەلویستی ئیسلام بكەی لەبارەی سەری سال و مەسیحیەتەوە ئەوا دەبوو كەسیكی شارەزاو پسپۆرت بانگ كردبا لە بواری شەریعەت دا كە لەو بوارەشدا تایبەتمەندیەكی هەبایە، ئەگەر مەبەستیشت مقارنەی ئەدیان و جیاوازیەكانی نێوان ئیسلام و مەسیحیەت بووە دەبوو هیچ موجامەلە و خاترانەیەكی تێدا نەبووایە، نە هەم لەلایەن جەنابت و نە لەلایەن ئەو مامۆستا بەرێزەوە كە لەوێ بوو، بەلام ئێستاشی لەگەل بێ نەمانزانی سروشتی بەرنامەكەت چۆن و بە چ ئاراستەیەك بوو .

بێگومان بابەتێكی وا هەستیار كە پەیوەندی بە دوو تێروانینی تەواو پێچەوانەی یەكترەوە هەیە دەبوو پێشكەشكار كۆمەلێك زانیاری باشی لەلا بێ لەسەر تیروانینی ئیسلام و مەسیحیەت بۆ بابەتەكە، بۆ ئەوەی بتوانێ پرسیارو رەخنەكانی خۆی لێوە دروست بكات و بابەتەكە بوروژێنێ بەلام لە بەرنامەكەوە بۆمان دەركەوت جگە لە هەندێ زانیاری گشتی و قسەی ناوخەلك شتێكی ئەوتۆی لە بابەتەكە نەدەزانی! پێشكەشكاری بەرنامەكە نەك تەنها لەسەر بابەتەكە زانیاری نەبوو بەلكو تەكنیكی پرسیار كردن و وەرگرتنەوەی وەلام و دروست كردنی پرسیاریشی زۆر لاواز بوو، ئەو پرسیارەی دەبوو لە مامۆستای بپرسێ لە قەشەی دەپرسی!!! لەو هەموو پرسیارە گرنگ و جیاوازیە بنەرەتیانەی نێوان ئیسلام و مەسیحیەت پرسیاری حەلال و حەرام و هەڵپەرینی خەلكی لەشەوی سەری سالدا ئاراستەی قەشە دەكرد!! ئەگەر ئەو بەرێزە هیچ زانیاری هەبوایە دەیزانێ كارو رۆلی مەسیحیەت تەنها پەیوەندی بەناو كەنیسەوە هەیەو بەس، ئەوان لە مێژە ئەوەیان قبول كردووە (دع ما لقیصر لقیصر وما لله لله) یان ئەوە كەی كێشەی قەشەیە كە لە ئیسلامدا زیناو مەشروب و تێكەلاوی حەرامە؟ ئەو بە پێی ئایینی خۆی دەروانێتە بابەتەكە، كەچی برای پێشكەشكار بەقەشەی دەگووت ئەو شتانە لە ئیسلامدا رێ پێدراو نین !!

بەرای من ئەوەی لەو بەرنامەیەدا گوزەرا هیچ نەبوو جگە لە پیشاندان و ناساندنی پیاوێكی ئایینی مەسیحی كە بە خەونیش بەتەما نەبووە رۆژێك لەوەها مینبەرێكەوە بانگ بكرێت بیرو باوەری خۆی تێدا بلاو بكاتەوە ... تا ئێستا كێ‌ دیتوویەتی كەنالێكی تەبشیری مەسیحی بانگی زانایەكی ئیسلام بكات و بلێ فەرموو بە ئارەزووی خۆت چیت هەیە بیلێ؟ ئەی بۆ دەبێ كەنالێكی ئیسلامی بەخۆی و كامیراكەیەوە بچێتە خزمەت قەشەو بلێ فەرموو, ئەویش هێدی هێدی بیروباوەری خۆی بە گوێی موسلمانان دا بدات و كەسیش نەبێ وەلامێكی باش و زانستیانەی بداتەوە؟ لەو بەرنامەیەدا بە داخەوە جەندان جار قورئانی پیرۆز بەدرۆ خرایەوە (پەنا بەخوا)، ئەوەی لە مینبەرەكانەوە چەندین سالە بە گوێی خەلك دا دەدرێ سفر كرایەوە ، كاتێك قورئان دەفەرموێ: (يحرفون الكلم عن مواضعه) قەشەش بەبەرچاوی ئەو هەموو بینەرە موسلمانەوە دەلێ یەك وشە لە ئینجیل نە گۆراوە, ئاسمان و زەوی لە جێی خۆیان نامێنن بەلام قسەی خوا (كە مەبەستی كتێبی پیرۆزە) لە جێی خۆی ناجولێ, ئەوە بەدرۆ خستنەوەی قورئان نیە؟! ئەی وەلام و رونكردنەوەی جەنابتان چی بوو؟

وەك عادەتی هەمیشەییان ئەوبەرێزانەی لە راگەیاندنە ئیسلامیەكان كار دەكەن زیاتر مجامەلەی میوانە نەیارەكانیان دەكەن، نازانم بۆ؟ باشتر وانیە مجامەلەو ریزگرتەنەكانتان هەلگرن بۆ كاتی ترو لە نێوانی خۆتان بێت نەك لە بەرنامەیەكی ئاوادا و لەسەر حسابی ئیسلام؟

مادام كە بەرنامەكەتان هەر سازدەدا نەدەكرا بەراشكاوی (بە بێ توورە بوون) پووچەلی بیروباوەرو قسەكانی قەشەتان خستبایە ڕوو؟ یان بۆچوونی ئیسلامتان بەبێ پەردەو بێ ئەملاولا بۆ خەلكی روون بكردبایەوە؟ وەك چۆن كاكی قەشە زۆر مەردانە باسی مەسیحیەتی خۆی دەكرد و بە جوانیش وەلامی پرسیارەكانی دەدایەوە لە روانگەی خۆیەوە, جار جاریش ژەهری خۆی دەرشت و قسەیەكی وای دەكر كە خودی قورئانی پیرۆزو پێغەمبەری ئیسلامی دەكردە ئامانج بەلام ئەو دوو بەرێزە نازانم تێنەدەگەیشتن یان رووگیری میوانداریی جەنابی قەشە بووبوون؟!!

بەرنامەی لەو جۆرە یان دەبێ ئەنجامی نەدەی یان دەبێ بە راشكاوی قسە بكەی نابێ لەبەر دل كەس راستیەكان لە خەلكی بشاررێنەوە، بەرای من هەر كەسێك شارەزایی یان پابەندیەكی تەواوی بە ئیسلامەوە نەبێ لەو بەرنامەیەوە ئەوەی لەلا دروست بووە كە ئیسلام و مەسیحیەت جیاوازیەكی ئەوتۆیان نیە، مادام مەلاو قەشە ئەوندە تەبا بن و قسەیان هیچی وای فەرق نەبێت و سەر بۆ یەكتری بلەقێنن، لە كەنالێكی ئیسلامی ناسراویش بلاو بكرێتەوە، كەواتە فەرقی چیە مرۆڤ موسلمان بێت یان مەسیحیی ؟

جگە لەوانەش كەناڵی پەیام لەرێی ئەو بەرنامەیەوە صلیب و شجرە المیلاد ی كردە میوانی ئەو هەموو مالە موسلمانە!! هەڵەیەكی تری زۆر زەق ئەوەبوو ناراستەوخۆ شەرعیەت درایە كاری تەبشیری كاتێك برای پێشكەشكار دەلێ: بۆچی موسلمان بۆی هەیە بانگەواز بكات بەلام مەسیحی بۆی نیە تەبشیر بكات ؟! لەكاتێكدا دەیان رێكخراوی تەبشیری ئێستا لە كوردستان دا هەن بە شێوازی جۆراو جۆر خەلك هەڵدەخەڵەتێنن !!

بەكورتی ئەو بەرنامەیە هەر لە بنەرەتەوە ئەنجامدانی هەلەیەكی گەورە بوو، چونكە تۆ دێی دوو پیاوی ئایینی لەسەر بابەتێك دەهێنیە قسە، ئەو دوو بەرێزە یان دەبێ بەگژیەكدا بچن و قسەی یەكتری بەدرۆ بخەنەوە، یان دەبێ هیچیان قسەی دلی خۆیان نەكەن، چونكە هەركامیان مەحكومن بە كۆمەلێك دەقی چەسپاوو نەگۆرەوە، كە تەواو پێچەوانەی یەكترن و هیچ رێگایەك نیە بۆ بەیەكەوە گونجاندنیان، ئینجیل دەلێ: عیسا لە خاچ دراوە، قورئان دەفەرموێ: درۆیە لە خاچ نەدراوە ، ئەوان دەلێن كتێبی پیرۆز وەك خۆی ماوە ، ئێمە دەلێین دەسكاری نەكراوە ...هتد .

خۆ ئەگەر بەرنامەكە باسكردن بووایە لە بابەتێكی سیاسی بەلامەوە زۆر گرنگ نەبوو جێ سەرسورمانبش نەدەبوو چونكە زۆرمان دیوە لەو كەنالە بەرێزە كەسی وا بانگ دەكرێت لەكولەكەی تەریشدا كەس ناوی نەبیستووە ئاستەكەشی لەوە تێپەر ناكات كە كۆمەلێك ئینشاو وتەی سواو دووبارە بكاتەوە كە هاولاتی ئاسایی خەریكە هەمووی لەبەر بكات, زۆر جار ئەو كەسانە لەوانەشن كە دژ بە فكرو بیروباوەری ئیسلامن و زۆر بێ شەرمانە دژ بە ئیسلام قسە دەكەن ، بەلام كاتێك باس لە بابەتێك دەكرێ كە پەیوەندی بە مصداقیەتی قورئان و پێغەمبەری ئیسلامەوە هەیە سەلامی خوای لەسەر بێ ئەوا بەراستی مایەی قبول كردن نیە هەر كەسێك بیكات پێویستە ئاگادار بكرێتەوە و سەرزەنشتیش بكرێت .

بۆیە من وەك موسلمانێك داواكارم كۆمەلی ئیسلامی لە تێپەرینی ئەو هەڵەیە بێدەنگ نەبێت و لەو بابەتە بكۆلنەوە، ئەوانەی دەستیان هەبووە یان كەمتەرخەمیان كردوە سزا بدرێن و بەرنامەكە و پێشكەشكارەكەشی لە كەنالەكە دوور بخرێنەوە یان كارێكیان پێ بدرێت كە لە ئاستی خۆیان دا بێت .