تاوەكو رژێمی گۆڕبەگۆڕی بەعس لەسەر حوكم بوو ، قێزەونترین تاوانی بەناوی ئیسلامەوە ئەنجام دەدا، كە دڕوندانەترین و ترسنۆكانەترینیان ، تاوانی بەناو ئەنفال بوو ، كە لە ژێرناوی سورەتێكی قورئانی پیرۆزدا زیاتر لە سەدو هەشتا هەزار هاوڵاتی بێ تاوانی كوردی زیندەبەچاڵ كردو ، زیاتر لە چوار هەزار گوندی كوردستانی _ بەمزگەوت و قورئانەوە _ سووتاند و خاپووری كرد، بەڵام خوای گەورە تۆڵەی ئەو بێتاوانەی كردەوەو بەو ڕۆژە گەیشت كە هەموومان چاوەڕوانی بووین ، چونكە دڵنیا بووین لەوەی كە نزای بێتاوانان دەگاتە قاپی خوداو ، خوداش بەگەورەیی خۆی پێشوازیان لێدەكات و زۆرداران بەسزای عادیلانەی خۆیان دەگەیێنێت . پێمان وابوو ئیتر سەدام دەبێتە پەند بۆ ئەوانەی شوێنی ئەو دەگرنەوەو، لەترسی سزای دووا رۆژی خۆیان هەرگیز جورئەت ناكەن دەست بۆ كارێك ببەن كە بۆنی زوڵم و ستەمی لێ بێت ، بەتایبەتی دژ بە میللەتێك كە تا دوێنێ و پێرێ جگە لەباوەشی ئەو، هیچ مەئواو شوێنێكیان نەبوو سەریان پێدابكەن ، كەچی هەر ئەو سپڵەو نمەك بەحەرامانە ڕێك لاسایی ئەو دیكتاتۆرە دەكەنەوە كە خۆیان زیاتر لەهەموو كەسێك بەدەستیەوە ناڵاندویانە . ئێستاش بەداخەوە یەكێك لە مەرجەع و زاناكانیان لە ژێر پەردەی ئایین ، ژەهری خۆی دەڕێژێ و ، بەناوی مەهدیێك كە تەنیا _گومانێكە _ خوێنی كورد حەڵال دەكات و، ڕاستەوخۆ بە هەوادارو پەیڕەوانی دەڵێت: لەهەر كوێیەك كوردێكتان بینی و، دەستان ڕۆیشت بەسەریاندا باز نەدەن و بەزەیتان پیادا نەهێتەوە ، چونكە (مەهدی) زۆر تامەزرۆی خوێن و كوشتنی ئەوانە ، بۆیەشە هەر كوردێك كە گەیشتە سنووری حوكمڕانی ئەوان ، ئەوا بەبێ سەر دەگەڕێتەوە.

 دواین فەتوای شەڕانگێزیان ئەوەبوو كە لەسەر زاری (جلال الدینی صغیر/ خوای گەورە بچوكتری بكاتەوە) كە زانایێكی شیعە مەزهەبەو سەركردەیە لە ئەنجومەنی باڵای ئیسلامی و ، لە خولی پێشودا پەرلەمانتاری پەرلەمانی عیراقی بووە لەسەر ئەو لیستەو ئێستاش وتاربێژی مزگەوتی (براسا) یە لەبەغدا ، لەدژی كورد ڕاگەیێنرا ، ناوبراو لەو فەتوایەیدا دەڵێت: ( كە مەهدی هاتە خوارەوە، ئەوا یەكەم كەس كە شەڕیان لەگەڵدا دەكات میللەتی كوردە). دوواتر ویستی ڕووی خۆی و درۆكانی سپی بكاتەوەو لە بەیاننامەیێكدا دەڵێت : (مەبەستم هەموو كورد نەبووە ، بەڵكو تەنیا خراپەكانم مەبەست بووە).

 لە وەڵامدا دەڵێم : ئەگەر مەبەستت تەنیا خراپەكان بووە ، خۆ پیاو خراپ تەنیا لەنێو كورددا نین ، بۆچی ئەو مەهدیە تەنیا ڕقی لە خراپەكانی كوردەو بەلای خراپەكانی ئێوەدا ناهێت ؟ خۆ خراپ هەر خراپە، كورد بێت یان غەیرە كورد!! بەڵام دیارە لای ئەم دەجالە كورد چاكی تیا نییە ، بۆیە مەهدیە گومانیەكەی جلال الدینی سەغیر ئەوەندە لێیان بەقینەو ، هەر لە ئێستاوە شمشێرەكەی بۆ شەڕی ئەوان تیژ كردووە.

پرسیار لێرەدا ئەوەیە: بۆچی ئەوكاتە مەهدی شەڕی لەگەل كورد نەدەكرد كە هەموو سەركردەكانیان وەك گەداو دەرۆزەكەر لەهەموو دەرگایێكیان دەداو، جگە لەكورد كەس دەرگای بە ڕوودا نەدەكردنەوە؟ بۆچی تا شوێنیان نەبوو كورد میللەتێكی ڕەسەن و میوان پەروەرو چاكەخواز بوو ، بەڵام كە شوێن پێیان قایم كرد ، شمشێری لێدەردێنن و خوێنی حەڵال دەكەن؟ پێمان بلێن: چیتان لەسەدام و بەعس كەمترە ؟ سەدام بەناوی قورئان و ، ئێوەش بەناوی (مەهدی) ؟

بێگومان هەردووكیان دوو ڕووی یەك دراون ، بەڵام جیاوازیان تەنیا لەوەدایە كە سەدام تەنیا وەك نەتەوە دژایەتی كوردی دەكرد ، بەڵام ئەمانە بەهەردوو لایەنی دینی و نەتەوەیی دژایەتی دەكەن ، سەدام دژایەتی خۆی نەدەشاردەوەو بە ئاشكرا هاواری دەكرد، بەڵام ئەمانە گورگن لە پێستی مەڕ خۆیان حەشارداوە.

 

ئایا كامەیان شایستەی ئەوەن مەهدی شەڕیان لەگەڵدا بكات؟

ئەوانەی كە پێیان وایە خودای گەورە هەڵە دەكات و هەندێ جار لە بڕیارەكانی خۆی پەشیمان دەبێتەوە , یان ئەوانەی كە بڕوایان وایە خودای گەورە زاتێكی پاك و بێگەردەو داناو زانایەو ، نە هیچ لەبیر دەكات و نەهەڵەش دەكات؟

كامەیان شایستەی شمشێری مەهدین ؟ ئەوانەی كە بڕوایان وایە قورئان حەڤدە هەزار ئایەتەو سێ بەشی لێ فڕیدراوەو دەسكاری كراوە، یان ئەوانەی بڕوایان وایە قورئان كەلامی خودایەو نەهیچی لێ كەم كراوەتەوەو نەهیچی لێ زیادكراوە، بەڵكو خۆی پاراستویەتی و هەر بە پاراستویەتی دەمێنێنێتەوە ، هەروەكو خۆی بەڵێنی داوە؟

كامەیان شایستەی شمشێری مەهدین؟ ئەوانەی كە بڕوایان وایە زۆربەی هەرە زۆری سەحابەو یارە دڵسۆزەكانی پێغەمبەری خودا هەڵگەڕاونەتەوەو لەدین دەرچوون ، یان ئەوانەی كە بڕوایان وایە هەموویان سەحابەی پێغەمبەری خودان و، بە سەرو بە ماڵ بەرگریان لە قورئان و پێغەمبەرو دینی ڕاستەقینەی خودا كردووە؟

بۆچی مەهدی لەدژی ئەوانە شمشێرەكەی دەرناهێنێت كە بڕوایان وایە هەموو خێزانەكانی پێغەمبەر داوێن پیس و بوون و پێغەمبەری خوداش بێ غیرەتی قەبوڵ كردووە؟ ئەو مەهدیە بۆچی شمشێرەكەی بۆ ئەوانە ناخاتەگەڕ كە بەناوی ئەوەوە شەرعیەت دەدەنە زیناو داوێن پیسی و ، بەگەورەترین فەزیلەشی دادەنێن؟

بۆچی مەهدی بەر لەهەموو كەسێك زمانی جلال الدینی سەغیرو هاوشێوەكانی نابڕێت كە بەناوی ئەوەوە درۆ دەكەن و خوێنی میللەتێكی سەراپا موسوڵمان و ئاشتی خواز حەڵال دەكەن؟!

ئەوەندەی ئێمە بزانین مەهدی كەسێكی دادپەروەرەو ، بۆ ئەوە دێت دەستی ستەمكارو زۆرداران لەسەر چەوساوان و ژێردەستان ببڕێتەوە ، بەقسەی جلال الدینی سەغیر بێت ، ئەویش هەر هاوشێوەی سەدام و مالكیەو ، ئەوەی ئەوان لەدەستیان نەهاتووە ، ئەو دێت تەواوی دەكات ، كۆكردنەوەی سەربازو تۆپ و دەبابەش بۆ لەشكركێشی كردنە سەر كوردستان و داگیركردنەوەی ، دیارە هەر بە ڕێنمایی و هەوای ئەو مەهدیە ساختەیە بووە ، كە جلال الدینی سەغیرو بەكرێگیراوەكانیان خەونی پێوە دەبینن _نەك مەهدی ڕاستەقینە_.

ئەگەر جلال الدینی سەغیر درۆ ناكات ، كاتی خۆی كە ڕژێمی بەعس لەساڵی 1963 داوای لە سەماحەتی ئایەتوللا (محسن الحكیم) كرد فەتوایێك دەربكات و تیایدا خوێنی كورد حەڵال بكات ، بۆچی (محسن الحكیم) ئەو فەتوایەی نەدەداو ئەو كێشەیەی لە كۆڵ سەغیرو مەهدی نەدەكردەوە ؟ خۆ ئەو زۆر لەو سەغیرە زاناتر بوو ، كەچی بە پێچەوانەی بەعس و سەغیرەوە گووتی: ( چۆن خوێنی كورد حەڵال بكەم لە كاتێكدا لە دین و لە نیشتیماندا برای ئێمەن) ، خۆ ئەو سەغیرە بۆ مەهدی لە سەماحەتی (محسن الحكیم) دلسۆزتر نییە ، بۆیە نابێت هەڵوێستی ئەو كەڵە پیاوانە لەبیر بكەین و بەیەك چاو سەیری سەغیرو ئەوانە بكەین.

چونكە ئەوەی سەغیر كردویەتی درۆیێكی سووكە بەناوی مەهدیەوە بۆ ڕشتنی كینەو ڕقی خۆی لەدژی میللەتی كورد. دڵنیاشم بەو ڕق و كینەیەوەش دەچێتە باوەشی شەیتان و ڕووڕەشی دونیاو قیامەت دەبێت.

بەڵام داخی گران تا ئێستاش هەندێ كەس پێی وایە هیچ مەترسیێك لەسەر كورد نییەو ، هەندێ خەڵك تەنیا بۆ مەرام و بەرژەوەندی خۆی ئەم ململانێیەی دروست كردووە. ئیتركاتی ئەوە هاتووە كورد یەكدەنگ و یەكدەست لەدژی ئەمانە بوەستێتەوەو، چیتر ڕێگا نەدات خەڵكێكی ناحەزو سپڵە یاری بە چارەنووسیان بكات. دڵنیام ڕۆژێك لە ڕۆژان چاكەو نمەكی كوردان دەیانگرێت و ، بەدەردی پێشینەكانیان دەڕۆن.