به‌ناوی خوای گه‌وره‌‌و میهره‌بان
دوای ئه‌وه‌ی له رێگه‌ی راگه‌یاندنه‌كانه‌وه چه‌ند سوكایه‌تیه‌ك به‌رامبه‌ر پیرۆزیه‌كانی موسڵمانان ئه‌نجامدران، ناره‌زاییه‌كی تووندی جه‌ماوه‌ری‌و ره‌سمی لێكه‌وته‌وه، له به‌رامبه‌ردا یه‌كێتی زانایانی ئایینی ئیسلامی كودستان پێش هه‌موویان هاته سه‌ر هێڵی كاركردن‌و، چه‌ند داواكارییه‌كیان خسته روو، خۆشبه‌ختانه سه‌رجه‌م داواكارییه‌كان له شوێنی خۆی بڕیاریان له‌سه‌ر درا.
رۆژی یه‌كشه‌مه كاتژمێر (9)ی به‌یانی سكاڵای یاسایی له‌لایه‌ن یه‌كێتی زانایان‌و وه‌زاره‌تی ئه‌وقاف له‌سه‌ر گۆڤاره‌كه‌‌و نووسه‌ری ئه‌سڵی بابه‌ته‌كه تۆمار كرا، هه‌روه‌ها له كۆبوونه‌وه‌یه‌كی هاوبه‌شی چه‌ند لایه‌نه له په‌رله‌مانی كوردستان، كه یه‌كێتی زانایان وه‌ك نوێنه‌ری مامۆستایانی ئایینی به‌شداری كرد، هه‌ر ئه‌م رۆژی بڕیاری داخستنی گۆڤاره‌كه درا‌و، لیژنه‌ی ئه‌وقافیش له په‌رله‌مان ده‌ستیان كرد به ئاماده‌كردنی پڕۆژه بڕیارێك بۆ ئه‌وه‌ی به یه‌كجاری سنوورێك بۆ ئه‌م شتانه دیاری بكرێت.
دوای ده‌رچوونی ته‌واوی بڕیاره‌كان چه‌ند مامۆستایه‌كی ئایینی شاری هه‌ولێر بۆ دڵنیابوون سه‌ردانی سه‌رۆكی حكومه‌تی هه‌رێمی كوردستانیان كرد‌و، كاك نێچیرڤان بارزانی به‌ڵێنی هه‌مان ئه‌و بڕیارانه‌ی پێدان، كه پێشتر له كۆبوونه‌وه‌ی په‌رله‌مان ده‌رچووبوون، پاش ئه‌وه یه‌كێتی زانایان پێی وابوو، مادامه داخوازییه‌كان هاتنه‌جێ، ئیدی پێویست به خۆپیشاندان ناكات، به‌ڵام ئه‌مڕۆ ژماره‌یه‌كی زۆر هاووڵاتیان هاتنه ده‌ر‌و خۆپیشاندانیان بۆ به‌رده‌م په‌رله‌مانی كوردستان كرد، ئێمه له كاتێكدا رێز له هه‌ست‌و سۆزی دیندارانه‌ی هاووڵاتیانی موسڵمان ده‌گرین، به‌ڵام په‌نابردن بۆ تووند‌و تیژی‌و سه‌ركه‌وتن به‌سه‌ر دیواری دام‌و ده‌زگاكان‌و، شكاندن‌و سوتاندن‌و به‌ردبارانكرنی خانوو‌و بینایه‌‌و ئۆتۆمبێل سیمای جوان‌و مه‌ده‌نیانه‌ی خۆپیشاندانه‌كان ناشیرین ده‌كات، به‌تایبه‌تی ماوه‌ی چه‌ند رۆژێك ناره‌زاییه‌كان زۆر به هێمنانه‌‌و شارستانیانه به‌ڕێوه ده‌چوون‌و، كه‌چی به‌م كارانه سیمایه‌كه ناشیرین بوو، به‌تایبه‌تی تێپه‌ڕین بوو به‌سه‌ر بڕیاره‌كانی په‌رله‌مان‌و به‌ڵێنه‌كانی سه‌رۆكی حكومه‌ت، بۆیه داوا له هاووڵاتیانمان ده‌كه‌ین خۆیان دووربگرن له هه‌ر تووند‌و تیژییه‌ك‌و، ئه‌من‌و ئاسایش‌و هێمنی ولات بپارێزن، داوا له مامۆستایانی ئایینیش ده‌كه‌ین وه‌ك پیشه‌ی له مێژینه‌ی زانایانی ئایینی رۆڵی هێوركردنه‌وه ببینن‌و، ده‌شخوازین كه‌س ئه‌م كارانه‌ی تووند‌و تیژی له‌سه‌ر مامۆستایانی ئایینی حسێب نه‌كات، داوا له‌لایه‌نه په‌یوه‌ندیداره‌كانیش ده‌كه‌ین سووربن له‌سه‌ر به‌جێگه‌یاندنی به‌ڵێنه‌كانیان‌و، ئه‌م كارانه ساردیان نه‌كاته‌وه.
.
مه‌كته‌بی ته‌نفیزی
یه‌كێتی زانایانی ئایینی ئیسلامی كوردستان
8/5/2012
هه‌ولێر | 
شاندێکی زانایانی تورکیاو یەمەن و مەغریب لە ئەکادیمیای جیهانی زانایانی تەسەوف سەردانی مەکتەبی تەنفیزی یەکێتی زانایان دەکات
