روونكردنه‌وه‌یه‌ك سه‌باره‌ت به دابه‌شكردنی موڵك و خانوبه‌ره‌ی وه‌قفكراو له نێوان هه‌ردوو دیوانی وه‌قفی سوننی و شیعیدا
الحمد لله رب العالمبن والصلاة والسلام على سيدنا محمد وعلى آله وصحبه أجمعين وبعد:
ئه‌نجومه‌نی باڵای فه‌توا له هه‌رێمی كوردستان جه‌خت ده‌كاته‌وه له سه‌ر ئه‌وه‌ی كه ئه‌و رێكه‌وتنه‌ی كراوه له نێوان هه‌ردوو دیوانی وه‌قفی سوننی و شیعیدا سه‌باره‌ت به دابه‌شكردنی هه‌موو موڵكه وه‌قفكراوه‌كان له سه‌ر بنه‌مای تائیفه‌گه‌ری، كارێكه پێچه‌وانه‌ی ئاشكرای ئه‌حكامی شه‌ریعه‌تی ئیسلام، چونكه هه‌ر ده‌سوه‌ردانێك له ماڵی وه‌قفكراودا پێویسته له سه‌ر بنه‌مای مه‌رج و مه‌به‌ستی كه‌سی وه‌قفكار بێت، هه‌موو شتێكی وه‌قفكراو پێویسته وه‌ك خۆی بمێنێته‌وه به‌و شێواز و مه‌رجانه‌ی كه پێشتر له سه‌ری وه‌قفكراون، چونكه مه‌رجی وه‌قفكار وه‌ك ده‌قی خاوه‌ن شه‌رع وایه، دروست نییه ده‌ستكاری كردنی مه‌وقوفات به بڕیار و رێكه‌وتنی ئیداریی، هه‌روه‌ها رۆڵی وه‌زاره‌تی ئه‌وقاف یان دیوانی ئه‌وقاف له به‌ڕێوه‌بردنی موڵكه‌كانی وه‌قفدا ته‌نها سه‌رپه‌رشتیاریكردن و به‌رێوه‌بردنه به ره‌چاوكردنی به‌رژه‌وه‌ندی وه‌قفكراوه‌كان تایبه‌ت به‌و جیهه‌تانه‌ی كه له سه‌ریان وه‌قفكراون، هه‌روه‌ها رۆڵیان جێبه‌جێكردنی مه‌رجه‌كانی وه‌قفكاره، له‌گه‌ڵ نۆژنكردنه‌وه‌و به به‌رهه‌مهێنانی وه‌قفكراوه‌كان، بۆیه مافی هیچ لایه‌نێكی حكومی یان ناحكومی نییه كه ئه‌ملاكی وه‌قفی شه‌رعی بفرۆشێت یان بیخاته ره‌هنه‌وه یان بیگۆڕێت یان بیبه‌خشێت یان ته‌نازول و سازشی له‌سه‌ر بكات یان هه‌ستێت به هه‌ر ده‌ستكاریكردنێك كه زه‌ره‌ر بدات لێی یان مه‌رجی وه‌قفكار پێشێل بكات.
هه‌روه‌ها دابه‌شكاری موڵكه وه‌قفكراوه‌كانی پارێزگای كه‌ركوك به نیوه‌یی له نێوان هه‌ردوو دیوانی وه‌قفی سوننی و شیعیدا داده‌نرێت به تاڵانبردنێكی روو وئاشكرا، گرتنه‌به‌ری رێگه‌یه‌كی نوێیه بۆ گۆڕینی دیموگرافیای دانیشتوانی ئه‌و پارێزگایه‌و تێكڕای ناوچه كێشه له‌سه‌ره‌كان له ژێر په‌رده‌ی ئاییندا، كه ده‌بێته هۆی په‌رته‌وازه‌بوونی نه‌سیجی نیشتیمانی و تێكچوونی ئاشتی كۆمه‌ڵایه‌تی.
(والله ولي التوفيق)
یه‌كێتی زانایانی ئایینی ئیسلام له كوردستان
ئه‌نجومه‌نی باڵای فه‌توا
هه‌ولێر: 24/11/ 2020ز
