ئەمرۆ 14ی11ی2024  بەرێز د.عبدالله مەلا وەیسی سەرۆکی یەکێتی زانایان بەشداری لە پانێڵێکی تایبەتی کۆلێژی پەروەردەی زانکۆی ئاکرێ لە قەزای ئاکرێ کرد، کە بە ناونیشانی پێکەوەژیانی ئایینی و چۆنیەتی پەرەپێدانی و قوڵکردنەوەی ئەم هەستە لەناو کۆمەڵگە ساز کرا بوو.

لەم پانێڵەدا کە نوێنەری ئایینەکان و ژمارەیەکی بەرچاو لە کەسایەتی ئایینی و ئەکادیمی تێیدا بەشدار بوون، بەرێز سەرۆکی یەکێتی زانایان بابەتێکی پێشکە کردو باسی لە گرنگی پێکەوەژیانی ئایینی و بایەخدانی ئیسلام بەم پرسە کرد، هەروەک دۆخی پێکەوەژیانی ئایینی لە کوردستان بە گرنگ وەسف کردو رایگەیاند ئەوەی هەیە قەناعەتەو دروشم نیە، لەوەشدا زانایانی ئایینی رۆلی بەرچاویان هەبووەو هەیە لە قوڵکردنەوەی ئەو هەستەو چۆنیەتی بەرەو پێشبردنی رەوشی کۆمەڵگە بە گشتی.

لە بەشێکی تری قسەکانی سەرۆکی یەکێتی زانایان گوتیشی: خۆشبەختانە لە هەرێمی کوردستان گرفتی ئایینیمان نیەو هەمووان بە رێز لە یەکتر گرتن رەچاوی تەبایی نێوان پێکهاتەکان سەقامگیری کوردستان دەکەن، ئەمەش بۆتە جێی شانازیەکی گەورە بۆ هەرێمەکەمان لە هەموو رووێکەوە.