رۆژانی ٦-٧/ ٣/ ٢٠٢٥ لەژێر چاودێری (مەلیک سەلمان عەبدولعەزیز) بەسەرپەرشتی رابیتەی جيهاني ئيسلامی و بە بەشداری شاندێکی باڵای هەرێم کە پێکهاتبوو لە بەرێزان د.پشتیوان سادق وەزیری ئەوقاف و کاروباری ئایینی و د.عبدالله مەلا وەیسی سەرۆکی یەکێتی زانایان و شێخ ابراهیم بەرزنجی پشکێنەری گشتی لە دیوانی وەزارەت، دووەمین کۆنگرەی نێودەوڵەتی بەناونیشانی ( دروستکردنی پردی پەیوەندی نێوان مەزھەبەکانی ئیسلام ) (المؤتمر الدولي بناء الجسور بين المذاهب الاسلامية) لە شانشینی سعودیە بە بەشداری نوێنەری 90 وڵاتی جیهان لە کەسایەتی ئاینی و موفتی و ڕوناکبیرانی ھزری ئیسلامی و کەسانی پەیوەندیدار بەرێوە چوو.
ئامانجی سەرەکی کۆنگرەکە؛ گفتوگۆو رەخساندنی زەمینەی دیالۆگێکی ھاوبەشە لە پێناو خزمەتی گشتی و دروستکردنی پردی پەیوەندی نێوان مەزھەبەکانی ئاینی پیرۆزی ئیسلامە، بۆ رووبەرووبونەوەی کێشە و ئاڵنگاریەکان.
شاندی باڵای هەرێم لەم کۆنگرەیە پەیام و هەڵوێستی زانایانی کوردی بۆ بەشداربووان خستە ڕوو، کە خۆی لە پەیامی میانڕەوی و لێبوردەیی و پێکەوەژیانی ئاینی و نەتەوەیی پێکهاتەکانی کوردستان دەبینێتەوە.
لە وتەیەکدا سەرۆکی یەکێتی زانایان رایگەیاند: ئەم کۆنگرەیە لە کاتێکی هەستیارو لەپێناو ئامانجێکی ویستراو خزمەتێکی گەورە بە پردی پەوەندی نێوان مەزهەبەکان دەکات، ئەمە قوڵکردنەوەی هۆشیاری و بەهاو قیەمی ئایینیە لەپێناو ژیانێکی هاوبەش و رێزگرتن لە یەکتری، ئەمەش لەپێناو لێکتێگەیشتن و دیالۆگ و بەرچاوخستنی خاڵی هاوبەش و وەلانانی ناکۆکی و نەهێشتنی گوتاری رقەبەری و تەکفیرو شکاندنی یەکتری، بۆیە ئێمە وەکو زانایانی ئایینی لە کوردستان پاڵپشتی بۆ ئەم هەنگاوەو یەکتر قبوڵکردن و کاری پێکەوەیی دەکەین و هیوادارین هەمووان بە نیەتپاکی و رێزگرتن لە تایبەتمەندی یەکتری و کارکردن لەسەر خاڵە هاوبەشەکان هەنگاوی جددی بنێین.
